100-day plan buatsaih turin Assam CM ngen

Assam-a economist rualte chuan chief minister Sarbananda Sonowal chu lockdown a zawh hnuah, an state economy siamṭha tura hma lakna tur, 100 day action plan buatsaih turin an ngen. 

Chief minister hian an state-a economist leh expert, mi 29-te chu kawmin, Covid-19  leng vanga an state-in harsatna an tawh leh, an state economy a nghawngte siam-ṭhatna tura rawtna an neih hrang hrangte a sawipui a ni. 

Economist-te chuan block level aṭanga hma indin­tharna tura hmalakna kalpui a nih theih nan, economic task force din an rawt a, hei hi CM pawhin ṭha a ti hle a ni. Hei vang hian economy dinhmun siamṭha tura short leh long term goal siam a ṭul thu pawh chief minister chuan a sawi bawk. 

Economic system siamṭha tura 100-day action plan siam chu a pawimawh hle tih sawiin, Sonowal chuan sorkar chuan sum lama harsatna an tawhte laka inkhaichhuahna turin sector ṭhenkhat thlur bing a tum tih sawiin, agriculture leh animal husbandry lam chu ngaih pawi­mawh a ni ang, a ti. Hemi rual hian sorkarin sum a hman pawh tihtlem a ngaih thu a sawi. 

Hri leng vangin hmun dang aṭangin Assam mi, ṭhalai nuai 10 chuang zet chu an state-ah hian an kir tih sawiin; hei hi phurrit ni loin, thil hlu leh an state tana ṭha zawk tura an lo thlir a ngai a ni, a ti.