Nagaland CM-in sikul 51 infrastructure a hawng

Nagaland chief minister Neiphiu Rio chuan Inrinni liam ta khan Kohima-ah virtual-in Samagra Sikhsha hnuaia state chhung hmun hrang hranga sikul 51 infrastructure a hawng.

Virtual hmanga hawn zingah hian sikul building thar 15, sikul 17-a classroom siam belh, zirtirtu quarters 18 leh residential hostel pakhat an tel. CM chuan zirna infrastructure thuam chakna tura hmasawnna pawimawh tak a ni tih sawiin, sorkar laipuiin a puihna avangin lawmthu a sawi. Director L Jamithung Lotha kaihhruai Samagra Sikhsha team hmalaknate a fak bawk.

State chhunga school infrastructure tam tak chu siam ngheh an la ni lo tih CM chuan a sawi a, siam ngheh thuai a ṭul thu sawiin, harsatna tam tak hmachhawn chunga school education department-in hma a sawn zel chu lawmawm a tih thu a sawi. Hmun kilkhawr leh chhengchhe deuh hmunah pawh infrastructure lamah hma an sawn zel tih Rio chuan a sawi a, tualchhung mite chu sorkarin infrastructure a siamsakte pawh uluk taka enkawl a, mahni ta anga ngai turin a chah.

Chief Minister chuan zirna ṭha pawimawhzia sawiin, hmasawnna awm theihna a ni a, khua leh tuite thuam chakin, economy lamah hma sawn tirtu, khawtlang dinhmun siamṭhatna tura pawha pawimawh a ni, a ti. Nagaland ṭha zawk siam turin zirna ṭha chu a pawimawh a, zirlaite tan pawh hmun him leh nuai siam tura theihtawp chhuah ṭheuh turin a ngen.