Manipur : KSO-in sorkar sikul endikna campaign kalpui dawn

Manipur-a Kuki Students' Organisation (KSO), Sadar Hills chuan Kangpokpi district puma sorkar sikul endik hna an kalpui dawn.

KSO Sadar Hills general secretary K. Shongreng chuan zirtirtu kal lo an tam vang leh an duty ngaihsak lo an tam ṭhin vanga he thil hi ti an nih thu sawiin, hengte hian sorkar enkawl zirna in tam takah zirna lama hmasawnna an tiṭhuanawp tih a sawi.

"Mipui vantlang sum aṭanga hlawh la heng zirtirtu ṭhenkhatte chuan an hnathawhnaa an mawhphurhna an hlen chhuak lo a, hetianga naupang zirna ngaihsak lohna hian kan fate hmalam hun leh zirna kalphung a tichhe hle a ni," tiin Shongreng chuan official thuchhuahah a sawi.

An hmalakna hnuaiah hian KSO district leh block unit-te chuan an bial chhunga sikulte chu hunbi neiin an endik ṭhin dawn a ni. Zirtirtu, chhan ṭha tak nei loa sikul kal lo emaw, an mawhphurhna tihlawhtling lo emaw nia hriatte chu thuneitute hnenah hremna an dawn theihna turin hriattir nghal an ni ang. Zirlai pawl chuan zirna tihchangtlung kawnga an hmalak chhante sawiin, state chhung buaina tuar nasa Kangpokpi district-ah hian hun rei tak chhung zirna lamah harsatna an tawh bakah, inkaihhruaina mumal awm lo chuan zirna boruak a tichhe tawh tih an tarlang.

KSO hian nu leh pa, zirlai leh tualchhung stakeholder-te chu zirtirtu kal lo emaw, nungchang dik lo emaw te chu report siam turin an chah a, boruak siamṭhat kawngah nasa taka pui turin an ngen.