Assam : Kopili luia bungraw phurh chhunzawm

Assam-a lui hmanga sumdawnna tuaithar tura hmalaknaah, National Waterway-57 (River Kopili) chu Zirtawpni aṭang khan hman ṭan niin, a vawi khatna atan Chandrapur, Kamrup-a Govardhan lei aṭanga South Salmara-a Hatsingimari thleng cargo trial run neih a ni. He hmalakna hi kum 10 hnua Assam-a intra-state waterborne freight transport kalpui leh ṭanna a ni.

Cargo vessel MV VV Giri hian Kopili lui (NW-57) leh Brahmaputra lui (NW-2)-a km 300-a thuiah M/s Star Cement metric ton 300 a phur a, darkar 12 aṭanga darkar 14 vel a thang a ni. He hmalakna hmang hian Assam-a national waterways km 1,168 chuang chu hman theih a ni leh tawh tih union minister of ports, shipping & waterways, Sonowal chuan a sawi.

National waterway paliah cargo hmanga sumdawnna hi kalpui a ni dawn a, chungte chu Assam-Brahmaputra (NW-2), Barak (NW-16), Dhansari (NW-31) leh Kopili (NW-57) te an ni. Hei hian kawngpui tawt a tihziaawm dawn bakah, mipui tan eizawnna a siamsak dawn a ni.