Tripura : December-ah International cricket stadium peih fel a ni dawn: CM

Tripura chief minister Manik Saha chuan an state-a a hmasa berna turin Narsinghgarh, Agartala-ah cricket stadium chu kumin December thla hian peih fel beisei a nih thu a sawi. Infiamna lama politics inrawlh loh a pawimawh thu sawiin, CM Saha chuan sorkarin infiam lama mi thiam tak tak chawikan a tum thu a tarlang.

Chief Minister chuan he thu hi K.C. Girls School Cricket Ground-a Tripura Cricket Association (TCA) leh Benggal Tigers, Kalmalpur, Dhalai district-a T10 exhibition match hawnnaah a sawi a ni. Kum 2017 khan stadium sak mek chu a tlawh thu sawiin, hnathawh dan a mumal loh bakah ruahmanna felfai a awm lo tih a sawi a, tun hnua TCA committee te inpekna leh an hnathawh ṭhat avangin mellung pawimawh tak an thleng ta a ni tih a sawi bawk.

Sorkar chuan infiamna mai ni loin sector hrang hrang chawikanna lamah pawh theihtawp a chhuah tih sawiin, hna lak chungchangah pawh a thiam leh tling ngeite lain langtlang taka kalpui a ni, a ti. State pumah sport infrastructure din belh zel a, tualchhunga infiam lama tui leh thiam zawn chhuah an ni dawn tih a sawi bawk. Tripura chuan theihna tam tak a nei tih sawilangin, facility neih ṭhat a pawimawh, a ti. Stadium sak zawh a nih hunah chuan Tripura chuan international match a huaihawt dawn tih CM chuan a sawi.