Tripura : IPFT-in Tripura-ah SIR kalpui phut

Tripura-a rorellai, BJP thawhpui Indigenous People's Front of Tripura (IPFT) chuan an state-ah electoral roll ennawnna, special intensive revision (SIR) kalpui ve an phut tih nimin khan an sawi.

BJP thawhpui dang, Tipra Motha Party (TMP) aiawhte pawhin Chief Election Commissioner (CEC) Gyanesh Kumar hmuin Tripura-a SIR kalpui ve turin an lo ngen tawh bawk.

IPFT general secretary, Swapan Debbarma chuan an party president Prem Kumar Riang kaihhruaiin, member pali awmte chuan August 1 khan CEC an hmu a, SIR kalpui ve tura ngenna memorandum pawh an thehlut tih a sawi. Memorandum-ah hian state chhunga India khua leh tui dik tak ni lote chu roll aṭanga paih an ṭul tihte pawh an tarlang niin a sawi.

Debbarma chuan August 23 hian 'Sixth Schedule Day' hmangin, Agartala-a Swami Vivekananda Ground-ah vantlang inkhawm pui tham tak buatsaih an tum tih a sawi bawk. Sixth Schedule Day-ah hian an party chuan Delhi-a Jantar Mantar-ah rally an nei ṭhin a, mahse kuminah chuan nakkumah Tripura Tribal Areas Autonomous District Council (TTAADC) inthlan a awm dawn avangin Agartala-ah rally hi an nei zawk dawn tih a sawi. Governor N Indrasena Reddy kaltlangin Tripaland din tura ngenna chu union home minister Amit Shah hnenah an thehlut dawn tih a sawi bawk. IPFT hi TTAADC area-a Tipraland state hran din phuttu an ni.