Assam : Ni nga chhungin structure 4,000 chuang tichhia

Assam-a BJP kaihhruai sorkar hmalaknaa sorkar ram dan loa luah sawnchhuah an kalpui meknaah, Golaghat district-a Renga Reserve forest-ah ni nga chhungin structure 4,000 chuang tihchhiat a ni a, ram bigha 8,900 dawn thenfai a ni tawh bawk.

Ni nga chhungin ramngaw ram zau tak, dan loa luah chu lak let leh a ni tawh a, Bidyapur, Pithaghat, Sonaribeel, Doyalpur, Dolonipathar, Kherbari, Anandapur, leh Madhupur-a dan loa structure sakte pawh tihchhiat an ni tih Inrinni zan khan sorkar thuchhuah chuan a tarlang.

Uriamghat huamchhung bakah Assam-Nagaland ramria dan loa inbengbel sawnchhuah beihpui hi July 29 khan kalpui ṭan a ni a, sorkar ram bigha 11,000 thenfai tuma hmalak mek a ni. State forest department-in hriattirna a tihchhuah hnuah, Bengali ṭawng hmang Muslim zinga mi tam tak chuan an chenna hmun an chhuahsan tawh a, July 29 aṭang khan bulldozer hmangin chenna in, dawr leh thil dangte chu tihchhiat a ni.

Muslim chhungkua chauh sawnchhuah an ni a, Assamese, Nepali, Boro leh community dangte chuan forest rights certificate an neih avangin sawnchhuah an ni lo tih official chuan a sawi. Doyang Reserve Forest huamchhunga Merapani hnuaia Negheribil-a chhungkaw 205 te chu chu August 8 aṭanga sawnchhuah an ni dawn tih hriattirna an pe leh tawh bawk.

Chief minister Himanta Biswa Sarma chuan Inrinni khan Bangladesh mi nia rinhlelhte chauh sawnchhuah an ni tih a sawi a, community dangte lakah sawnchhuah hna kalpui a ni dawn lo, a ti. BJP chuan Bengali ṭawng hmang Muslim-te chu Bangladesh aṭanga dan loa pem lut anga ngaih an ni a, Bengali-Muslim tam tak chuan district dangah chenna in an nei niin a sawi.