Meghalaya : Minister-in dan loa pemlutte lakah fimkhur turin ngen

Meghalaya cabinet minister leh National People's Party (NPP) hruaitu, Rakkam A Sangma chuan state ṭhenawm Assam-in an state-a dan loa sorkar ram luahte sawnchhuah beihpui an thlak mek karah, district hruaitu, police official, tualchhunga pawl awmte bakah thuneitu dangte chu dan loa state chhunga inbenbel tum emaw, an ram luah tum emaw an awm lohna turin thawh hona ṭha tak nei turin a ngen.

Minister chuan a bial Rongara-Siju chu Assam nen ramri inṭawm lo mah se, dan loa pem lut an tam chuan state pum a nghawng dawn tih a tarlang. Sixth Schedule hnuaia dan siam hmangin Meghalaya-ah state pawn lam mite tan dan loa inbenbel phal a ni lo tih a sawilang bawk.

Assam sorkarin a sawnchhuahte an state-a an tlanchhe tur vengin, Meghalaya-a pawl ṭhenkhat chuanAssam aṭanga lirthei tlan lutte chu uluk takin an endik mek bawk a ni.

Chief minister Conrad K Sangma chuan district hotu, a bik takin ramri huamchhunga awmte chu fimkhur turin a chah a, ramri kaltlanga dan loa state chhunga lut tur an awm chuan report nghal turin a hriattir. Sorkar chuan block officer, police team, village defence unit, pawl hruaitu, leh NGO-te nena thawh hona ṭha tak nei turin Deputy Commissioner-te pawh an be reng tih a sawi bawk.