Nagaland : CM hoin infiamna lama hmasawnna tur sawi ho

Nagaland chief minister leh Nagaland Olympic Association (NOA) president ni bawk Neiphiu Rio chuan Thawhṭanni khan Kohima-a NOA office-ah meeting pawimawh a ko a, infiamna lama hmalakna kalpui mekte ennawnin leh state chhung infiamna lama hmasawnna tur thil pawimawh an sawi ho.

Meeting-ah hian National Games vawi 39-na February 2027-a Meghalaya-a neih tur chungchang leh, hemi atana inbuatsaih dan turte chu sawi ho tam ber a ni. Nagaland hi wrestling discipline co-host a ni dawn a ni.

CM Rio chuan North East Games neih leh tur atana inbuatsaihna kal mek a endik bawk a, October 2025-a neih tura ruahman ni mah se 2026 kumtir lamah sawn niin Tripura-in a thleng dawn a ni. Nagaland-in event lian pahnih, November 15- 23, 2025 chhunga UWW Alysh Belt Wrestling leh Naga Wrestling World Championship bakah Dr. T. Ao Junior (Girls) National Football Championship a thlen tur chungchang pawh an sawi ho bawk.

Chief Minister chuan NOA gym facility sak zawh ṭep tawh chu a tlawh a, helai hmuna thawk tur - gym instructor, multi-task assistant leh cleaner lakna tur pawh tihchhuah a ni tawh a, gym hi hman ṭan thuai theih tura beisei a ni. Ṭhalai infiamna lama tui tak tak zawn chhuah a, rampawn lam thleng pawha hlawhtlinna an neih theihna turin sorkar chuan hma a la zel a ni, a ti.