Manipur : MTU-ah AI, robotics course awm dawn: Governor

Manipur Technical University (MTU) chuan Artificial Intelligence, Renewable Energy, Robotic leh Data Science course hawn an tum tih governor Ajay Kumar Bhalla chuan Thawhlehni khan a sawi.

Governor Bhalla, MTU chancellor ni bawk chuan MTU kum 10 tlin lawmna, Takyelpat, Imphal-a neih hmanpuiin, thawktute inpekna a fak hle a, rampum huap inelnaa zirlaite hlawhtlinna a lawmpui thu sawiin, university-a Artificial Intelligence, Renewable Energy, Robotic leh Data Science course hawng tura ruahmanna an siam pawh ṭha a ti hle. Ṭhalaite chu khawvel changkannain a kentel ang zela nun thiam a pawimawh tih sawiin, zirlaite hnenah degree chauh ni loin, huaisenna leh mawhphurna hlen chhuah a pawimawh thu a hrilh.

Kum 2016-a MTU din a nih hnua university ṭhanlen dante, National Education Policy (NEP) 2020 zulzuia hmasawnna ropui tak an neihte Governor chuan a tarlang. MTU chu zirna in mai ni loin, Manipur hmalam hun tana hmun pawimawh a nih thu sawi. Governor chuan stakeholder zawng zawngte chu lungrual taka hna thawk turin a fuih a, Manipur mai ni lo hmarchhak bial tan pawh hmun pawimawh tak a ni, a ti.