Nagaland : Job reservation policy ennawn tur commission din remti

Nagaland cabinet chuan state-in sorkar hna laknaa job reservation policy a hman mek ennawn tur member pasarih awmna Reservation Review Commission (RRC) din rawtna a pawm.

Cabinet thutlukna hi Minister for Power and Parliamentary Affairs leh sorkar thupuangtu, KG Kenye chuan Cabinet meeting neih zawh hnua Kohima-a press conference neihnaah a puang. Kenye chuan hna lakna chanpual dah, job reservation policy hi mipui inhnialna ber a ni tih sawiin, ṭhenkhatin policy an thlawp laiin a ṭhenin duh loin memorandum an thehlut bawk a ni, a ti. Ngaidan in ang lo awmte pawh sorkarin a hria a ni, a ti.

Kenye chuan an reservation policy an hman mek chu kum 48 hman a ni tawh a, hei hian nghawng ṭha tak a nei em tih zawhna pawh a la awm reng a ni, tiin a sawi. Policy an siam chhan ber, hnam tinte chawikanna tura tih chu a hlawhtling em tih pawh ngaihtuah tur pawimawh tak a nih thu a sawi bawk.

RRC din turah hian cabinet chuan chairperson pakhat, sorkar official pathum leh NGO pathum aiawh awm turin a ti a, chairperson hi chief minister nen inbiakrawn hnuah thlan a ni ang. Sorkar lam aṭangin Personnel and Administrative Reforms (P&AR) department hotu bakah, Law and Justice department aiawh leh Home Commissioner an tel ang a, NGO lam aṭangin Nagaland People’s Organisation (ENPO), Central Naga Tribes Council (CNTC), leh Tenyimi Union Nagaland (TUN) aiawhte an tel bawk ang. NGO aiawha tel turte hi mi zahawm tak, inrelbawlna kawnga tawnhriat nei ṭha tak tur an ni tih an sawi. Policy ennawn tur hian thla ruk hun pek an ni ang a, a ṭul dan azira pawhsei theih a ni ang. Report an thehluh hunah cabinet in a lo ennawn ve leh dawn a ni.