Assam : Sorkarin naupang inneih tirna tihbo tum : CM

Assam chief minister Himanta Biswa Sarma chuan Nilaini khan thuchhuah siamin, a kaihhruai sorkar chuan kum 2026-ah state chhunga naupang inneih tirna a thlen tawh lohna turin nasa takin hma a la dawn tih a sawi. 'Nijut Moina' scheme hmangin naupang inneih tirna hi tihbo theih a nih thu a sawi bawk.

Chief Minister chuan naupang inneih tirna do kawnga hmalakna atan Nijut Moina 2.0 hman leh a ni dawn tih sawiin, hei hian Assam-a hmeichhe naupang nuai 4 chuang a huam dawn a, inneih tirna lak aṭanga chhanchhuakin, ṭha zawka lehkha an zir theihna turin a pui dawn a ni, a ti. Scheme hman thar leh turah hian zirlai hmeichhe naupangte chu form sem an ni. Nu leh pa, an fanute lehkha zirtir duh, an zirna sensoa harsatna tawkte tan Nijut Moina chuan beiseina leh phur tharna a pe dawn a ni,a ti.

Assam-ah hian society pahnih awmin, pakhat zawkah hian hmeichhia kum 22 te chuan zirna sang zawk university an kal theih laiin, society dangah chuan hmeichhe naupang kum 14 chinte chu pasal neih tir an ni thin tih Sarma chuan a sawi. Vantlanga inthlauhna awmte tihbona turin naupang inneih tirna chu tihtawp vek a ni dawn tih a tarlang a, Assam chu India ram state zinga zirlai naupang tana a thlawna admission tih theihna state awmchhun a nih thu a sawi bawk.