Sikkim : Sorkarin Shravan Kumar Award siam dawn

Sikkim sorkar chuan state level-a chawimawina 'Shravan Kumar Award' a siam thar. He award hi nu leh pa, tar emaw, damlo emaw enkawlna kawnga mi inpete chawimawina tur atana ruahman a ni.

He thu hi chief minister Prem Singh Tamang chuan August 15, 2023 khan a lo puang tawh a, he chawimawina hi state-a chhungkaw nunphung tihhmasawnna tur leh, tar enkawlna kawnga mawhphurhna la tura ṭhangtharte fuih tumna a ni. Chawimawina hi kumin aṭangin kum tin Independence Day-ah sem ṭhin a ni ang.

Rural Development Department-in a enkawl tur, he chawimawina hi Indian mythology-a mi ṭha leh zahkai tak, Shravan Kumar hming chawia siam a ni. Chawimawina dawng tur hi kum tin Sikkim-a Gram Panchayat tin aṭangin mi pakhat thlan chhuah zel a ni ang. State sorkar aṭangin pawisa fai, Rs nuai 1 an dawng dawn a ni.

He hmalakna hi sum leh pai lama harsa zawk ṭhalai, nu leh pa enkawlna kawnga theihtawp chhuahte leh chhungkaw tana mi ṭangkai tak takte dinhmun ngaihtuah siam a ni. A dawng turte pawh dik leh felfai taka thlan an nih theihna turin endik hna pawh langtlang taka kalpui a ni ang.