Assam : Sorkarin damdawi-in 5 MoU a ziahpui

Assam-a Directorate of Social Justice & Empowerment (SJE) Geriatric healthcare tihchakna tura hma lain, state puma khua leh tui kum upa tawhte mit enkawlna tur atan damdawi-in panga nen Memorandum of Understanding (MoU) an ziak. He hmalakna hi sorkar laipuia Social Justice &Empowerment-in Atal Vayo Abhyuday Yojana (AVYAY) a kalpuina hnuaiah neih a ni.

MoU hi Assam Administrative Staff College (AASC), Khanapara-ah ziakin, Social Justice & Empowerment director Bhaskar Jyoti Manta-a'n a kaihruai a, SC & BC Welfare director, Persons with Disabilities commissioner, leh All Assam Senior Citizens’ Association member-te pawh an tel.

Memorandum an ziahpui damdawi-in pangate hi Sankaradeva Nethralaya, Guwahati; Guwahati Eye Centre, Guwahati; Gauhati Lions Eye Hospital, Guwahati; Drishti Netralaya, Dibrugarh; leh Chandraprabha Eye Hospital, Jorhat-te an ni.

Bhaskar Jyoti Manta chuan kum upa zawkten hriselna ṭha an neih theihna tura sorkarin hma a lak thu sawiin, scheme hnuaiah hian screening, surgery, leh post-operative care-te chu a thlawn vek a ni dawn tih a puang. He thawh hona hi Assam-a kum upa lam mi sang tam takten an hlawkpui beisei a ni a, khaw hmuh fiah zawk, hriselna ṭha zawk an nei thei dawn a ni.