Meghalaya : Bangladesh mi 4 man zingah police constable tel

Meghalaya police leh Border Security Force (BSF) ṭangkawp chuan, South West Khasi Hills-a ṭhalai mipa pakhat rukbo chungchanga inhnamhnawih nia sawi, Bangladesh mi pali chu Inrinni khan an man a, an mi man zingah hian police constable pakhat pawh a tel. An mi mante hi pawikhawihna lianthama tel ṭhin an ni tih an hrechhuak bawk.

South West Khasi Hills-a superintendent of police (SP) Banraplang Jyrwa chuan August 8, zing dar 1 velah silai keng mi pariat- pakua inkar chu Rongdangai khuaa dawr pakhatah lutin, he dawr chhunga lo awm Balsrang A. Marak (21) chu a lua silai tin chungin dawr neitu phone number an dil a, pawikhawihtute hian New Rongdangai khaw lam panin an hruai a, thah an tum niin a sawi. Marak chu an phuarna aṭanga tal chhuakin, a bulhnai inah tlan lutin pawikhawihtute hian luhchilh lehin nasa takin kut an thlak a ni.

Police-te chuan an thudawn bawhzuiin pawikhawihtute zawn hna an thawk nghal a, an zawnna lamah hian hreipui, screwdriver, pawisa, wireless radio, mobile phone leh Bangladesh Police constable ID, Marufur Rahman-a ta an man. Inrinni zing khan Khonjoy khuaa tualchhung mite chuan pawikhawihtu pakhat chu manin police kutah an hlan. South West Khasi Hills police, BSF leh tualchhung mipui ṭangkawp chuan pawikhawihtu dange chu ramngaw huamchhungah an man zui leh bawk.