Rajya Sabha-in Manipur budget leh GST bill thawn let

Rajya Sabha rorel inkhawm, nimina neihah eptute aubuaina karah Manipur Appropriation Bill, 2025 leh The Manipur Goods and Services Tax (Amendment) Bill, 2025 chungchanga debate rei vak lo an neih hnuah pass loin, Lok Sabha-a ngaihtuah ṭhat leh turin an thawn kir.

Manipur Appropriation Bill hi finanial year 2025-26 atana Manipur Consolidated Fund aṭanga sum mamawh ṭhenkhat pek chhuah theihna tur a ni. Manipur Goods and Services Tax (Amendment) Bill, 2025, hi Manipur Goods and Services Tax (Amendment) Ordinance, 2025 thlakna tura tih a ni.

Union finance minister Nirmala Sitharaman chuan eptute chu Manipur budget an dodal avangin a sawisel a, Manipur chungchang an aupui reng laiin a budget leh GST bill ngaihtuah a nih velah thil danga an aubuai bakah bill pawh hi an lo dodal a ni, a ti.

Nimina Rajya Sabha rorel inkhawmah hian eptute chuan Bihar-a electoral roll ennawnna, Special Intensive Revision (SIR) kalpui a nih chu sawiselin an aubuai leh a ni.SIR chungchang hi sawi ho an phut a, Manipur bill ngaihtuah a nih lai pawhin House laiah chhuak khawmin vote lak an duh loh thu an sawi. Mahse eptute aubuaina karah hian voice vote lak a ni ta tho a, bill hi Lok Sabha lamah thawn let a ni leh zawk a ni.