Tripura : Class 12 pass-te Govt College-ah luh tir vek tiam

Tripura higher education minister Kishor Barma chuan Class 12 board examination pass-te chu sorkar college-ah admission luh tir vek a tiam.

Tun hnaiah Agartala-a Ramthakur Degtree College-ah professor pakhat chu principal signature lem siamin dan loin zirlai 100 admission a tihsak nia sawi a ni. He thil thleng vang hian zirlaite chuan lungawi lohna a lantir a ni. Hemi hnu hian minister chuan sorkar hnuaia degree college-ah Class 12 pass-te admission tihsak vek an ni dawn tih a sawi.

Minister chuan, "Higher secondary examination pass te chu government degree college-ah admission an hmu thei vek dawn tih ka sawi duh a ni. Mahse college leh subject erawh an duhthlan a ni vek thei lo ang. Kumin zirlai 24,000 in higher secondary examination an pass a, hetih lai hian state chhung college-a seat awm zat chu 33,000 a ni," a ti. Agartala-a degree college hrang hranga principal-te chu zirlai tam zawk an luh theihna tura an seat neih zat pawh tipung tura a hrilh tawh thu a sawi bawk.