Assam : AIUDF-in CM bang turin phût

Assam-a state party, All India United Democratic Front (AIUDF) chuan chief minister Himanta Biswa Sarma chu an state-a sorkara rama chengte sawn chhuah hna a kalpui danah, ram danpui zah lo leh a thuneihna hmang dik loah puhin bang turin an phût. Chief Minister dinhmun chelh zel tlak a ni tawh lo tiin President's Rule puan an phût bawk.

AIUDF hian Pathiannia Guwahati-a press conference neihah an thil phut hi an puang a ni. Party MLA Rafikul Islam chuan, Chief Minister chu bang ngei tura an phût thu sawiin, a dinhmun chelh zel turin dikna a hloh tawh tih a sawi.

Tun hnaia Upper Assam-a dan loa sorkar ram luah sawn chhuah beihpui an thlaknaah, Bengali ṭawng hmang Muslim mite chu bitum bikah CM chu an puh. "CM Sarma chuan misual rual a pun a, India khua leh tui, helai hmuna hun rei tak lo cheng tawhte chu tihluihna hmangin a sawn chhuah tir a ni," a ti. An party chuan hemi chungchangah hian Gauhati High Court chu hma la turin an ngen bawk. Upper Assam-ah hian Chief Minister kaihhruaina hnuaiah mi ṭhenkhat chungah pawikhawihna nasa tak thleng a ni, tiin Islam chuan a sawi bawk a ni.

State sorkar chuan kum 1971 hnu lama Assam-a pem lut, Hindu Bangladesh mite chu khua leh nihna pek a tum niin an puh bawk a, All Assam Students’ Union (AASU) hruaitute chu dodal turin an ngen. AIUDF hruaitu Ashraful Hussain chuan inthlanpui neih hmaa bial 26-a hlawkna an hmuh theihna turin sorkar chuan mipui sawn chhuah beihpui hi a kalpui a nih tih a sawi ve bawk.

AIUDF chuan sakhuana lam hawi zawnga mipui sawn chhuah hi democracy palzutna a nih thu sawiin, an mi sawn chhuah takte hi hmun tlawhpawh harsa Hindu tamna hmunah sawn an ni tih a sawilang bawk. Sawn chhuah takte chu awmna tur mumal leh chhawmdawlna pek an phut bawk.