Arunachal : Northeast Aviation Summit thleng turin inbuatsaih

Arunachal Pradesh chuan a vawi khatna atan Northeast Aviation Summit a thleng dawn a, hemi atan hian a inbuatsaih mek. Civil aviation minister Balo Raja chuan Thawhṭanni khan department zawng zawngte chu a hlawhtlinna tura hma la turin a ngen.

Minister Raja hian Itanagar-a high-level review meeting kaihhruaiin, Northeastern Region Civil Aviation Ministers’ Conference-cum-3rd North East Aviation Summit chu state chhunga aviation sector tana hmalakna thar pholanna tur platform lian tak a nih tur thu a sawi. He summit, September thlaa neih tura ruahman hi Ministry of Civil Aviation (MoCA) leh Federation of Indian Chambers of Commerce & Industry (FICCI) te ṭangkawpin an buatsaih dawn a ni.

Meeting-ah hian Civil Aviation Department official-te leh sorkar mi pawimawh an tel a, summit hlawhtlin theihna tura an hmalaknate ennawn a ni. Raja chuan summit chu Arunachal Pradesh tana hun pawimawh leh chhinchhiah tlak a nih theihna turin inter-departmental-te chuan thawh hona ṭha an neih a pawimawh thu a sawi.

Kum 2023 leh 2024 khan Assam leh Meghalaya chuan summit hi an lo thleng tawh a, kumin hian a vawikhatna atan Arunachal Pradesh khawpui Itanagar-ah neih a ni ang. Summit neih hun tur hi September 5 ruahman a ni a, a tawp khar ni chu Ministry of Civil Aviation in a la tichiang dawn a ni.