Assam : Guwahati-a IIM sakna tur pawm

Union cabinet chuan Thawhlehni khan hmarchhak biala a pahnihna tur, Guwahati-a Indian Institute of Management (IIM) dinna tur bill a pawm. Hmarchhak biala IIM awmchhun chu Shillong-ah awmin, ram chhungah IIM 22 a awm mek bawk a ni.

Sorkar senior official-te chuan sorkar laipuiin he project kalpuina tur hian Rs vbc 500 a ruahman tih sawiin, IIM thar tur hian Guwahati chu zirna tihhmasawn kawngah a puih beisei a nih thu an sawi. Guwahati-ah hian IIT Guwahati, National Law University leh Judicial Academy, bakah Changsari-ah AIIMS- te pawh an awm.

Official-te chuan IIM thar hian zirlaite tan zirna lamah program ṭha leh research neih theihna hun ṭha zawk a siamsak dawn tih an sawi. He zirna in hi thiamna nei ṭhate tan hmun pawimawh tak a ni dawn a, kutkawih eizawnna (entrepreneurship) a tihpun dawn bakah, economy ṭhanlenna tur atana pawimawh sector hrang hrangah theihna a siam dawn tih an tarlang.

He hmalakna hi sorkar laipuiin hmarchhak biala zirna sang zawk infrastructure tihchangtlung a tumna kawnga hmalakna pakhat niin, tun hnaiah central university, AIIMS campus leh research center thar eng emaw zat a awm tawh bawk. Zirna hmun changtlung leh changkang zawk din a nih chuan zirna lama inthlauhna a tiziaawm dawn a, hnathawh tur a tipung dawn a ni, tiin official-te chuan an sawi bawk.