Sikkim: Delhi-ah high-level meeting nei

Sikkim Lok Sabha MP Indra Hang Subba chuan Nilaini khan Pakyong airport-a thlawhtheihna service chhunzawm a nih leh theihna turin New Delhi-ah high-level meeting neih a nih thu a sawi. Meeting hi Thawhlehni khan Udaan Bhawan-ah minister of state for civil aviation Murlidhar Mohol kaihhruainaa neih niin, June 2024 aṭanga Pakyong airport-a thlawhtheihna service tihtawp chungchang sawi ho a ni.

Meeting-ah hian Pakyong airport director Balasaheb Pote chuan official-te chu airport dinhmunte hrilhfiahin, hmasawnna leh tihchangtlunna an kalpuinate leh thlawhtheihna service ngelnghet awm theihna tura infrastructure tihmasawn tura ruahmanna an neih dan kimchang takin a sawi. He hunah hian Ministry of Civil Aviation senior official-te leh SpiceJet, IndiGo, leh Alliance Air aiawhte an tel. Private airlines-te chuan hun rei tak chhung thlawhtheihna service rintlak taka kalpui a nih theihna turin thawh hona ṭha neih an duh thu an sawi.

MP hian Sikkim leh state dangte intlawhpawhna siamṭhatna tura airport pawimawhnate sawiin, tihtawp a nih avang hian mipui, tourism, leh eizawnna lamah nghawng ṭha lo a neih thu a sawi. Meeting-ah hian thlawhtheihna service kalpui lehna tura harsatna awmte sawi ho a ni bawk a, chung zingah chuan boruak inthlak danglam, thlawhtheihna hman dan tur, leh thlawhtheihna thlawh hun rintlak siamte pawh a tel. Mohol chuan service chu rang taka kalpui a nih theihna turin airline leh stakeholder-te nen inremna an siam theihna turin ministry chuan a lo puih tur thu a sawi bawk.