Assam CM-in Assam leilung fate dikna chanvo venhim zel tiam

Assam chief minister Himanta Biswa chuan state leilung fate tan theihtawp a chhuah zel dawn a, an nihna leh dikna chanvo venhim sak zel a tiam.

Guwahati-a nimina Indenpence Day lawmnaah thu sawiin, CM chuan a kaihhruai sorkarin dik lo taka sorkar ram hectare 16000 chuanga awmte hnawh chhuah hna a kalpui mek chungchang sawiin, hei hi Assamese te venhimna tur peng pakhat a nih thu a tarlang. An hmalakna hian sorkarin state leilung fate nihna leh dikna chanvote humhalh zel a tum zia a tilang a ni, tiin a sawi.

An ram luahsak tumte laka hma an lak zel tur thu sawiin, CM chuan Assam mipuite chu an ngawih reng chuan kum 20-ah an la hriat ngai loh mi CM chuan hnam puanzar a pawt pharh thei mai dawn a ni, a ti. A thusawi hi a hnuah X lamah sawifiah lehin, Assam ram humhalh tura tun aṭanga hma an lak loh chuan kum rei loteah hnam dang, an state-a lutte chu chief minister pawh a nih thei dawn a ni, tiin a rawn sawifiah zui leh bawk.

Sarma chuan an ṭhalaite an ngawih reng a, Assam miten anmahni chimtute chu an lo ngaihnathiam zel chuan kum 10 hnu lekah ram leilung fate chuan an chanvo chu an hloh thei mai dawn a ni, a ti. "Kum 15 huah chuan state minister zinga 80% pawh hnam dang rawn lutte an ni thei dawn a, kum 20 a ral meuh chuan Independence Day-a hnam puanzar pawh pharhtu chu kan hriat ngai loh hnam an la ni thei dawn a ni," a ti. Assamese leh Indian a nihna angin, chutiang thil thleng tur chu a duh lo a, Assam mi tu pawhin an pawm thei dawn bik lo tih a sawi.