Harsatna karah hma kan sawn zel : Governor

Manipur governor Ajay Kumar Bhalla chuan Zirtawpnia Manipur Rifle parade ground-a Independence Day lawmnaa thu a sawiah, state-in tun hnaiah dan leh thupek kenkawh kawngah hmasawnna ropui tak a nei tih sawiin, harsatna karah pawh hmasawnna hmuh tur a awm mek a ni, a ti. Social welfare, infrastructure hmasawnna aṭanga economy tihchakna thlengin sector hrang hrangah hmasawnna ropui tak a awm thu a tarlang.

Governor chuan state leh sorkar laipui bakah civil society organization leh Manipur mipuite chuan remna leh muanna siam kawngah nasa taka hmalak a la ngaih thu sawiin, remna leh muanna tluantling nei tur chuan tun aia nasa zawka hma lak a la ngai a ni, a ti.

State chhunga dan leh thupek dinhmun chuan ṭhat lam a pan chho zel a, security force-te pawhin district hrang hranga hmun derthawng zualah dan loa pawisa khawn leh pawikhawihna thleng tihtawp tumin beihpui an thlak chhunzawm zel tih Governor chuan a sawi bawk. Social media-a thudik lo thehdarh leh inhuatna thu chhuah awm ṭhin enfiah turin uluk taka vil reng a nih thu leh, loneitute venhimna pawh tihchak a ni tih a sawi. Security force hmalakna avangin tun hnaiah chenna in hal, thihna leh silaia inkahna thleng a awm lo tih a sawi bawk.