Ram kang ṭhelh hna thawhnaah Indian Army, Assam Rifles-ten an pui

Manipur-Nagaland ramri, Dzukou Valley-a ram kang chu ṭhelh hna thawh chhunzawm zel a ni a, ram kang ṭhelhnaah Indian Army leh Assam Rifles-te chuan  National Disaster Response Force (NDRF)team-te an pui mek a ni. 

Ram kang ṭhelhna atan hian Dimapur leh Rangapahar-ah Mi-17 helicopter pali thawn luh a ni tawh bawk. Army hian air traffic control, air space managament lamahte Indian Air Force-te hi an lo pui bawk. 

Dzukou valley khawchhak lama ram kang chu thunun a ni tawh a, mahse a chhim lam erawh a la kang nasa hle a ni. Kar liam ta Inrinni khan kang ṭhelh tur hian NDRF team, mi 60 awmna chu tirh an ni a, Zirtawpni khan India Air Force Mi-17 helcopter tirh luh a ni tawh bawk a ni.

Thuneitute chuan Nagaland khawpui, Kohima aṭanga km 30 vel chauha hla, Dzukou Valley-a ram hi December 29 chawhnu lam aṭang khan a kang ṭan niin an sawi a, Manipur lamah a darh zel a, a ṭhelh mih nan hian ni eng emaw zat a ngai dawn niin an sawi. He hmun hi trekking-na atana hman lar tak a ni a, ram kan chhan hi hriat chian ni lo mah se, camper-ten an meichhem an tihmit ṭhat loh aṭanga rawn inṭan nia rin a ni.