Nagaland eptuten Disturbed Area Act pawhsei dodal

Sorkar laipui chuan Nagaland state pum 'disturbed area' a puanna chu thla ruk dang atan a pawtsei a, hei hi eptu pawl Naga People's Front (NPF) chuan na takin a sawisel. 

Press release siamin NPF chuan, " Naga buaina chungchang chinfel tuma inbiakna neih a nih mek lai leh, Naga mipuiten inremna tluantling siam a nih ngei theihna atana beiseina sang tak an neih laia sorkar laipui thupek siam hian min ṭhawng vek a ni. He thil hian Nagaland-a remna leh muanna a awmna tura hmalakna chu sorkar laipui hian a dah pawimawh tawk lo nia ngaihna pawh a awm phah a ni," a ti. A thutlukna siam tawh hi sut leh tura sorkar an phut thu an tarlang.

Naga peace talk neih mek chu a hmawr bawk a hnai tawh a, hei vang hian Naga mipuite pawhin an nghakhlelin, beiseina pawh an nei sang tih an thuchhuah chuan an tarlang bawk. Sorkar laipui chuan kar liam ta Nilaini khan Nagaland state pum chu thla ruk dang atan 'disturbed area' ah puan chhunzawmin, sipai hnena thuneihna sang pekna, sawisel hlawh tak Armed Forces (Special Powers) Act (AFSPA) chu hman chhunzawm a ni leh dawn a ni. He dan hi Naga pawl hrang hrangte chuan a hma pawhin an lo sawisel fo tawh a, 'dan sakei' tiin an sawi hial. 

Ministry of Home Affairs (MHA) chuan Nagaland state chu a la ralmuang tawk lo a, hei vang hian civil power thuam chak leh pui turin sipai chakna hman chhunzawm a la ṭul niin a sawi a ni.