Tripura : Zirlai pawlin lungawi lohna lantir

Tripura-a North East Students’ Organization (NESO) hnuaia Twipra Student’s Federation (TSF) chuan August 18 khan Tripura khawpui Agartala-ah dan loa pem lutte laka khauh taka hmalak phutin lungawi lohna (sit-in demonstration) an lantir. Lungawi lohna hi Circuit House bulhnaiah an lantir a ni.

TSF president John Debbarma chuan lungawi lohna hi Tripura pumah huaihawt a nih thu sawiin, dan loa pem lutte hriat chhuah leh thawn chhuah an nih theihna tura sorkar nawrna atana ti an nih thu a sawi.

Debbarma chuan dan loa pem luh chungchang hi Tripura emaw, hmarchhak state dangah emaw thil thar a ni lo tih sawiin, kum 40 chuang he harsatna hi an tawk tawh tih a tarlang. NESO thupek angin dan loa pem lutte hriat chhuah leh an rama thawn kir phutin nawrh hi huaihawt a nih thu leh, Chief Minister hnenah pawh memorandum an theh luh tur thu a sawi bawk. State sorkar chu Ministry of Home Affairs-in thupek a tihchhuahte khauh taka bawhzui turin a ngen a, hmarchhak state dangte nen inremna siam turin a chah bawk a ni.

Assam-a dan loa sorkar ram luahte sawn chhuah beihpui thlak mek a nih avangin, state dangte nen inbiakna neih a, Tripura-a dan loa pemlut an awm lohna tura inven a ṭul tih Debbarma chuan a sawi bawk.

Meghalaya khawpui, Shillong-ah pawh NESO hming zirlai pawlten Bangladesh aṭanga dan loa pem lutte khuahkhirh leh venna kawnga hma lak phutin nawrh an huaihawt bawk a ni. NESO chairman Samuel B Jyrwa chuan nawrh huaihawt chu hmarchhak bialin hun rei tak harsatna an lo hmachhawn tawh, dan loa pem lutte chungchanga sorkar che chhuak tawh tura an auhna a ni tih a sawi.