Meghalaya HC-in Police Accountability Commission din turin hriattir

Meghalaya High Court chuan Meghalaya sorkar hnenah thla li chhunga Police Accountability Commission din turin Thawhṭanni khan a hriattir.

High Court chuan kum 15 liam taah Meghalaya Police Act, 2010 siam a ni tawh chungin, tun thlengin panel hi din a la ni lo tih a sawi. He Act-a Chapter XII hnuaiah police-te inrelbawlna rintlak zawk an nih a, thil dik tawk lo tia puh an nihna chhui chian leh, police department kaihhruaina ṭha zawk a awm theihna turin commission hi din ngei a ngai a ni, a ti.

Meghalaya Police Act, 2010 hnuaiah hian dan hman a nih aṭanga thla thum chhungin commission hi din tura tih a ni a, mahse tun thlenga sorkarin a la din loh avangin court-ah hian PIL theh luh a ni. He dan hi tihtawp emaw, siamṭhat emaw a nih loh chuan dan in a phut angte chu sorkar chuan a zawm tur a ni tiin court chuan a sawi.

Act Section 74 chuan commission-a chairperson atan hian retired principal secretary-level officer dah turin a ti a ni. Home minister, chief secretary, home secretary leh DGP telna committee chuan commission chairperson tur hi an rawt ang.