Meghalaya: GHADC-in thla 43 hnua hlawh ṭhenkhat pek tur an hnawl

Meghalaya-a Garo Hills Autonomous District Council (GHADC)-a hnathawktute chuan thla 43 chhung hlawh an lak tawh loh hnuah, an thla nga hlawh dawng tura sorkarin rawtna a siam chu an hnawl.

GHADC chief executive member Albinush Marak chuan state sorkarin tun dinhmuna council-a hnathawk 1,350 chuangte thla nga chhung hlawh pek tihkhawtlai tawh pek theihna tur sum a nei tling tih sawiin, hei hi tun hnaia chief minister Conrad K. Sangma kaihhruai sorkarin Rs nuai 24.45 a tihchhuah zingah a tel tih a sawi.

Non-Gazetted Employees Association (NGEA) chuan Thawhṭanni August 18-a meeting an neihnaah council Executive Committee chuan hlawh ṭhenkhat pe tura rawtna awm chu an hnawl a, thla 43 chhung hlawh la pek loh awm zawng zawng chu a vaia pek an phut a ni.

Marak chuan state sorkarin tun thla aṭangin district administration kaltlangin GHADC hnathawkte chu hlawh pek an ni dawn tih a sawi. Tun dinhmuna hlawh chungchanga harsatna awm chu kum 10 dawn liam taa Congress kaihhruai GHADC administration-in hnathawk tur an lak dan mumal loh vang nia sawiin, council-a hnathawk, interview mumal nei loa lak mi 2,300 chuang an awm tawh tih a sawi bawk.

NGEA chuan sorkar rawtna chu hnawlin, hlawh la pek loh zawng zawng chu kimchang taka pek an nih theihna atan nawrh an chhunzawm zel tur thu a puang. Civil society organization-te chuan hnathawkte hi an thlawp thu an tarlang bawk a ni.