Assam sorkarin zirlai hmeichhia School kalte nitin Rs 100 zel pe dawn

Assam sorkar chuan an state chhunga school leh college-a zirlai hmeichhiate chuan class ṭha taka an kal theihna turin sum lama chhawmdawlna pek a tum. 

Education minister Himanta Biswa Sarma chuan zirlai hmeichhiate hi school/college an kal ni apiangin Rs 100 pek zel an ni dawn tih a puang. Hei bakah sorkar chuan January thla chhungin undergraduate leh postgraduate zirlai hmeichhiate bank account-ah Rs 1,500 leh Rs 2,000 dahsak an ni dawn tih sawiin, hei hi zirlai bu leina atana an hman theih tur thu a sawi. 

Minister chuan he ruahmanna hi nikum khan an siam tawh tih a sawi a, mahse hripui leng avangin an kalpui hman ta lo tih a sawi. School leh college-ah hmeichhe zirlaite chu ṭha taka an kal chhoh zel an duh tih a sawi a ni. Assam sorkar hian nikuma Class XII state board exam buatsaihah zirlai hmeichhiate zinga first division-a pass chin hnenah lawmpuina, scooter a sem bawk. 2020 Class XII board exam-ah khan hmeichhe zingah first division-a pass mi 22,245 an awm a ni. February thla hian kum 2018 leh 2019-a Class XII board exam-a first division-a pass, zirlai hmeichhiate pawh scooter hi pek an ni ve leh dawn bawk.