Sikkim-in hripui leng vangin Tourism sector-ah Rs vbc 600 hloh

Kum 2020-a Covid-19 hripui leng chuan Sikkim state-in sum a lakluh hnar ber, tourism industry a nghawng na hle. 

Khualzinte lut thei loa hun rei tak inkharkhipna leh khuahkhirhna te kalpui a ni a, hei vang hian nikum chhunga tourism industry-in sum a hloh hi cheng vaibelchhe 600 a tling pha niin Sikkim Tourism Development Corporation (STDC) chairman Lukendra Rasaily chuan a sawi. 

Ram chhung state hrang hrangah coronvirus a len hnu pawhin Sikkim hi hun eng emaw chen chu hri lakah hian a fihlim a, state chhunga hri kai hmuh hmasak ber chu nikum May thla kha niin, Delhi aṭanga haw zirlai pakhatin a kai tih hmuh chhuah a ni. Hri kai hmasa ber an hmuh aṭanga thla hnih hnuah hripui vanga thi hi an awm leh bawk. 

State chhunga hripui a darh tak avangin sorkar chuan hri darh zel tur venna atan ramri te a khar a, khualzinte luh khapin zirna leh sumdawnna hrang hrangah pawh khuahkhirhna a siam nghal a ni. Nathula border pass-a India-China insumdawn tawnna pawh tihtawp lailawk a ni bawk a ni.