Arunachal Pradesh: Sikula kangmei chhuakah zirlai pakhat thi

Arunachal Pradesh Shi-Yomi district-a Government residential school-ah Pathianni khan kangmei a chhuak a, zirlai naupang pakhat a thi a, pathum an hliam. Kangmei hi mipa hostel, Papikurung Government Residential School-ah zing dar hnih vela thleng a ni tih police superintendent S.K. Thongdok chuan a sawi.

Zirlai naupang inhliamte hi Lukhi Pujen (8), Tanu Pujen (9) leh Tayi Pujen (11) te an ni a, Zonal General Hospital, Aalo, West Siang district-ah enkawl mek niin kangmei chhuaka thi erawh tunge a nih hriat a la ni lo. Police team-te chu Monigong khua aṭanga km 17-a hlaah hian kangmei chhuah chhan chhui chiang tura tirh an ni tih officer pakhat chuan a sawi.

ANSU hruaitu leh journalist man

Arunachal Pradesh-a Chimpu police-te chuan ruihhlo tawlhruknaa inhnamhnawih nia puh, zirlai hruaitu leh journalist-te chu Itanagar-ah an man. An mi mante hi William Tana tara (27), All Nyishi Students' Union (ANSU) hruaitu, APN live aṭanga press ID nei leh, Biki Ohukan(28), H Sector, Itanagar amite an ni.

Police-te chuan Zirtawpni khan Grand Vitara var pakhat chu Chimpu check post-ah tidingin, officer-te chuan an kut aṭang hian heroin gram 2.5, damdawi bur ruak pali, pawisa, press ID card leh mobile phone an man sak a ni. Lirthei pawh hi an man nghal bawk. He beihpui thlakna hi Itanagar SDPO Kengo Dirchi, Itanagar police stattion OC inpector N Nishant leh Itanagar SP Jummar Basar-te kaihhruainaa neih a ni.

Chimpu police station-ah Narcotic Drugs and Psychotropic Substances (NDPS) act hnuaiah thubuai ziah luh a ni a, chhuizuina neih chhunzawm a ni dawn tih police-te chuan an sawi.