Assam-ah Myanmar mi pakua man

Assam-a Cachar-ah Thawhlehni tlai lam khan Myanmar mi pakua, state chhunga dan loa lut ru man an ni tih district police-te chuan Zirtawpni khan an sawi a, an zingah hian naupang panga an tel. Police-te chuan mi pakua hi Myanmar-a Rohingya hnam an ni a, Bangladesh pan tura an kal lam an man tih an tarlang.

Cachar police superintendent (SP) Numal Mahatta chuan Zirtawpni khan dan loa state-a lut an mante hi police kutah hlan an ni a, case pawh ziah luh a nih thu a sawi. India-Bangladesh ramriah Thawhlehni zan khan man niin, Delhi Badarpur rel station aṭangin Katigorah huamchhungah ramri kaltlanga luh ruk an tum lai chu tualchhung miten an lo man tih police-te chuan an sawi bawk a ni. An mi mante hian kum eng emaw chen Myanmar aṭanga an tlanchhiat tawh thu sawiin, Bangladesh refuge camp-ah an awm ṭhin a, Tripura kaltlangin India ramah eizawnna zawng turin an lo luh thu an sawi.