Tripura: CM-in judicial court thar hawng

Tripura chief minister Manik Saha chuan West Tripura district-a Mohanpur-ah Sub-Divisional Judicial Magistrate and Civil Judge (Junior Division) Court thar a hawng. Judicial court hi mipuiten langtlang leh rorelna dik tak an hmuh theihna tura buatsaih a nih thu sawiin, helai subdivision tana hmasawnna pawimawh tak a ni tih a sawi.

Facility hi Supreme Court kaihhruaina hnuaia din niin, judicial infrastructure tihhmasawn leh district court chhawk zawngkhaina tura ruahman a ni. Tun dinhmunah Tripura-a subdivision 23 zinga 15 chuan judicial magistrate court hi an nei tawh.

Chief Minister chuan dan kenkawh kawngah dikna chanvo ṭha tak pek chu a pawimawh thu sawiin, rorelna dik chu democracy-a thil pawimawh tak a ni, a ti. Prime minister Narendra Modi-a’n hmasawnna leh infrastructure a ngaih pawimawh avangin India leh Tripura-ah hmasawnna nasa tak a thlen thu a sawilang bawk.

CM Saha chuan Mohanpur-a chengte chu dan lam thilah Agartala an pan a ngaih ṭhin thu leh sum tam tak an seng ṭhin tih a sawi bawk. Court thar hmang hian tualchhungah rorelna an kalpui thei tawh dawn a, vantlang rawngbawlna tihchangtlun leh judicial system-a rinna tihchak tuma hma an lakna a tih lan thu a sawi bawk a ni.