Assam : DoNER-in infrastructure project pali titawp dawn

Ministry of Development of North Eastern Region (DoNER)-in Assam-a infrastructure tihhmasawnna tura project pali siam, Rs vbc 20 man hu chu hun rei tak chhung hmasawnna a awm lo leh zawh fel a la nih loh avangin a titawp dawn. State sorkar chu sorkar laipui hnenah Rs vbc 7.68 pe let turin a hriattir a ni.

He thutlukna hi tun hnaia New Delhi-a NESIDS-OTRI hnuaia Empowered Inter-Ministerial Committee (EIMC) meeting vawi 58-na neih a nih hnuah siam a ni. Official-te chuan hun eng emaw chen pek belh an nih tawh bakah, sum tam tak sen a nih hnuah pawh project thawhna kawngah hmasawnna a awm lo tih an tarlang.

Project pali tihtawp turte hi Rs vbc 1.42 senna tur Haflong Water Supply Scheme, Dima Hasao; kum 2006-a siam Rs vbc 5.12 senna tur Greater Mahur Town Water Supply Scheme, Dima Hasao; kum 2012-a Denow-Dehing Road, km 10.125-a thui thawm ṭhatna tur leh RCC lei dawh, Rs vbc 7.60 senna tur bakah, NH - 31 aṭanga Kashimpur Suplekuchi inkar siamna tur Rs vbc 5.63 senna turte an ni.

Project tihhhlawtlin loa awm hi Dima Hasao district chuan tuar nasa berin, tui in tur project pawimawh pahnih- Haflong leh Greater Mahur-te chu chhunzawm loh a nih avangin mipuiten harsatna an tawh phah a ni. Inspector-te chuan Haflong scheme hian point nga chauh a hmu tih sawiin, a tui chhuahna pakhat chu a chhiat tawh bakah, Chemical House pawh hman lohin a awm tih an tarlang.

Tun ṭum hi DoNER-in Assam-a project thawh ṭhat loh avanga hma a lak vawi khatna a ni lo a, tun hnai khan scheme eng emaw zat chu tihkhawtlai leh tihhlawhtlin ṭhat a nih loh avangin a lo titawp tawh bawk. District hnufual zawka project pawimawh tihtawp a ni chu thil pawi tak a ni tih ministry official-te chuan an sawi.