Arunachal Pradesh : Zirlai pawlin Siang survey neitu sipai lak chhuah phut

Arunanchal Pradesh-a Adi Students' Union (AdiSU) chuan chief minister Pema Khandu chu Siang Upper Multipurpose Project (SUMP) hnuaia survey hna thawk tura Siang leh Upper Siang district-a paramilitary force dahte chu chhuahtir turin an ngen.

August 25-a Chief Minister hnena memorandum an theh luhah, zirlai pawl chuan

pre-feasibility report (PFR) atana sipai dah hi khaw 31-ah mipui rawn loa kalpui a nih thu an tarlang. Hei hian bial chhungah hlauhthawnna leh buaina a chhuah phah niin an sawi bawk.

AdiSU chuan Boleng, Pangin, Kaying leh Pessing-a sorkar sikul ram chu dan loa luah a ni tih sawilangin, hetih lai hian khaw hotu, goan burah eng emaw zat chu a chhan sawichiang si loa ban an nih thu an sawi bawk. Union chuan ram luahtute hnawhchhuah an phut a, tualchhung hruaitu ban takte chu an nihna ngai chelh tir leh an phut bakah, khaw mipuite chu mumal taka rawn an nih hma chuan survey hnathawh tihtawp an phut bawk. Ni 15 chhunga an ngenna tihhlawhtlin a nih loh chuan lungawi lohna an lantir dawn tih an tarlang.

Siang luia project thawh tur, SUMP hi power MW 11,000 siam theihna tura ruahman niin, kum 2009 khan NHPC thawh tura ruahman a ni. Official-te chuan he scheme hian power siam chhuah bakah, tui kawng siam leh tuilian venna atana project pawimawh tak a ni dawn tih sawiin, India rama tuikhuah lian ber zinga mi a ni dawn a, tui cubic metre tld 9 vel a dah theih dawn a ni.