Meghalaya : CM-in Youth Mela hawng

Meghalaya chief minister Conrad K Sangma chuan Chief Minister's Youth Centre buatsaih, ni thum chhung awh tur Youth Mela chu August 25 khan a hawng.

CMYC hi open learning centre niin, kum 2022 khan Sauramandala Foundation, Project DEFY leh India Ultimate thawk hoin an din a ni. State chhunga thingtlang hmun hrang hrangah ṭhalaite thiamthil zirna kawngah an pui a, mahnia inzirna tur hmun NOOKs, library, bakery, carpentry leh electronic lam zirna an buatsaih ṭhin. An programme-ah hian entrepreneur 5,000 an inziak lut tawh a, heng aṭang hian abika puihna pek tur, 'Nanopreneurs' 55 thlan chhuah an ni.

All Saints' Hall, Shillong-a Youth Mela hawnna inkhawm neihah, CM chuan sorkarin an state hmasawnna tur hmathlir a neihah zirlaite chu sumdawnna, enterprise leh khawtlang rawngbawlna kawnga hruaitu dinhmun chelh thei turin a fuih.

CM Sangma chuan hmasawnna tura sorkar hmalakna sawilangin, loneitu, thingtlang lama entrepreneur, hmeichhia leh ṭhalaite tel lo chuan hlawhtlinna tak tak a awm thei lo tih a tarlang.