Manipur : Remna palai hna thawktu R.N. Ravi inbiakna neihpui Vawiinah New Delhi-ah ‘tripartite talk' nei dawn

Manipur sorkar chuan sorkar laipuiin Naga-te nena inremna a awm theih nana remna palai hna thawk tura a ruat R.N. Ravi chu hmuin, Pathianni khan inbiakna an neihpui.

Manipur transport minister Dr Kh Ratan chuan remna zawngin inbiakna neih a ni a, R.N. Ravi chu United Naga Council (UNC)-te'n November 1 aṭanga lungawi lohna lantira Naga-te chenna huamchhunga National Highway an dan tihtawp a nih theih nana hma la tura ngen a ni, a ti. Ratan chuan harsatna tawh mek chinfel a nih theih nan hma lak mek a nih thu sawiin, mipui mamawh lakkhawm kawngah theihtawp chhuah a ni, a ti. A bikin nitin mamawh lakhawm turin state sorkar chuan theihtawp a chhuah a, mipuite chunga tawrhna thleng mek chu pawi a tih thu a sawi.

State sorkar-in Sadar hills leh Jiribam-te district puitlingah hlankai tumin hma a la a, hei hi UNC-te chuan dodalin, state sorkarin district-a hlankai a tum chu Naga Territory a nih thu uar takin an sawi. November 1 aṭang khan sorkar hmalakna dodalin nawrh huaihawt ṭan a ni a, tun thlengin kalpui a la ni. UNC-te'n NH an dan avang hian mipuite chuan harsatna nasa tak tawk chho mekin, nitin mamawh ei leh bar lamah pawh mi nawlpuiin harsatna an tawk a ni. Thil man a sang chak hle a, a bikin petrol leh diesel man a sang chak zual hle. Hriat theih chinah petrol litre khat Rs 300-ah a kai chho tawh a, duh duha lei tur a awm lo bawk.

Hetih lai hian UNC-te chet dan duh lohna lantir hian,All Manipur United Clubs’ Organisation (AMUCO)-te chuan nawrh an lo huaihawt bawk. AMUCO chuan UNC-te chu NH kawngpui dan chawlhsan tura ngenin, mipuiten harsatna lian tham zawk an tawrh lo na tura hma la turin state sorkar an ngen bawk. Manipur-ah hian ni 15 chhung zet kawngpui dan a ni tawh a, bungraw phur lirthei eng emaw zat chu kawng lakah an tangkhang mek a ni.

Hetiang boruak a awm mek lai hian buaina chinfel tumin North Block, New Delhi-ah vawiin hian Manipur sorkar aiawh, United Naga Council (UNC) aiawh leh Ministry of Home Affairs (MHA)-te chuan ‘tripartite talk’ an nei dawn. UNC-te chuan sorkar laipuiah Memorandum of Understanding (MoUs) an thehlut tawh a, Sadar Hills, Naga aiawh leh Manipur sorkar-te'n inremna an ziah theih nana an thil phut chi li an thlen.

Manipur sorkar chuan Nag-te hi inremna a lo ziahpui fo tawh a, December 14, 1981 khan Manipur sorkar leh All Naga Students' Association, Manipur (ANSAM) aiawh te chuan inremna ziakin, November 10, 1992 khan Manipur sorkar chuan Naga Students’ Federation (NSF) te chu inremna a ziahpui leh a, September 27, 1996 khan UNCleh ANSAM-te chu Manipur sorkar hian inremna a lo ziahpui tawh bawk. Ministry of Home Affairs (MHA) pawhin Nag-te hi November 24, 2011 khan, inbiakna neih a nih hnuah inremna a lo ziahpui tawh bawk a ni.

Tun hnai khan United Naga Council (UNC)-te'n nawrh an huaihawt chungchang ngaihtuah hian UNC Presidential Council Meeting neih a ni a, All Naga Students’ Association, Manipur (ANSAM), Naga Women Union (NWU) leh mi pawimawh eng emaw zat an tel. Meeting chuan state sorkar kar nana kawngpui dan chu duh tawk loin, Naga territory huamchhunga Trans Asian Railways and National Projects kalpui mek chu titawp tura hmalak an rel.

Hetih lai hian Manipur Press Club thuchhuah chuan UNC-te'n Na-tio-nal Highway hun rei tak an dan chhungchangah state sorkar chu hma la chak tawk loah an puh. All Mani-pur Working Journalist’s Union (AMWJU)-te chuan petrol a harsat avangin vahvelnaah harsatna an tawk mek tih sawiin, sorkar chu chak zawka hma la tura ngenna thuziakte an tar a ni.