Shillong-ah Cherry Blossom Festival hmang mek

India rama a vawi khatna turin 'Cherry Blossom Festival' chu November 14 khan Meghalaya khawpui Shillong-ah ṭan a ni a, ni li chhung a awh ang.

Festival hi Meghalaya sorkar leh Manipur-a hmunpui nei Institute of Bio-resources and Sustainable Development (IBSD) leh National Institute of Department of Biotechnology-te'n an buatsaih a ni. IBSD Director Prof Dinabandhu Sahoo chuan festival-in a tum ber chu United Nations Sustainable Development Goals (SDG) tihhlawhtlin a nih thu a sawiin, kum 2017 khi United Nations-in International Year of Sustainable Tourism for Development atana a puan a ni a, hemi denchhen hian buatsaih a ni, a ti.

Cherry Blossom Festivals hi Japan-ah chuan Sakura Festival tiin hming vuah a ni a, Japan bakah hian USA, Korea, China leh Australia-ah te hman a lo ni tawh bawk. Washington DC-a Cherry Blossom Festival-ah chuan kum tin US dollar maktaduai 126 vel sum hmuchhuah ṭhin a ni a, khualzin tam takin an tlawh
ṭhin a ni.

Meghalaya Chief Minister Dr Mukul M Sangma chuan Shillong-a neih mek Cherry Blossom Festival hi Thawhṭanni khan Polo Ground-ah a hawng a ni. Meghalaya CM chuan hmarchhak bakah, ram chhung mipuiten Cherry Blossom Festival hmang tura Japan emaw USA emaw an pan a ngai tawh lo a, tunah chuan Shillong khawpui-ah hman a ni ve ta a ni, a ti. He festival-ah hian khualzinte hip thei thil hmuhnawm leh mit la tak tak pholan a ni.