Arunachal-in security force te ang khatin training pek tum

Arunachal Pradesh cabinet meeting chuan state chhunga Indian Reserve Batta­lion (IRB), Arunachal Pradesh Armed Police leh civil police training laite ang khat veka training pek tumna a pawm.

Arunachal Pradesh Home and Power Minister Tanga Byaling chuan he thu hi sawiin, sipai training nei laite chu an rilru lam chak tawk lohna avangin training mumal tak an neih ṭhin loh thu a sawi a, training nei ṭha lote chungah a ṭul anga action lak zel a ni, a ti.

"Security personnel tam tak chu suspend emaw an service tihtawpsak a ni a, training ang khat veka pek tumna hian rah ṭha a chhuah ngei ka beisei," tiin Byaling chuan a sawi.

Arunachal Home Minister chuan po­lice hnaruak hnawhkhah thuai an tum thu a sawi bakah Itanagar capital complex vela pawikhawihna thleng ṭhin chu khuahkhirh a nih tawh thu a sawi bawk.

Armed Forces (Special Powers) Act chu sorkar laipui leh state sorkar inbiak­na chiang lo avangin state puma ramri district-ah lekkawh a ni a, mahse hriatchian a nih hnuah hlih nghal a ni, a ti.

Hetihlai hian state cabinet chuan Itanagar leh Naharlagun khawpui tih­chang­tlunna tur project, vaibelchhe 1,500 hu a pawm bawk.

He project kaltlang hian Itanagar leh Naharlagun khawpuiah flyover, metro cable car, automated car parking slot, multi-utility city centre, double-lane bypass leh bus transit centre te siam a ni ang. Project fund hi Department of Economic Affairs leh Union Ministry of Finance aṭanga beisei a ni.