B'desh lawng chawlh hmun panna lei bawhzui ṭan

Tripura-aṭanga Bangladesh lawng chawlh hmun panna kawngpui, Feni lui chunga lei dawh tur chu India-in a bawhzui ṭan a, Detailed Project Report pawh buatsaih mek a ni.

Tripura Public Works De­partment-a chief engineer Sunil Bhowmik chuan he thu hi sawiin, "Feni lui chunga lei dawh turah premilinary work leh DPR kan buatsaih ṭan a, DPR hi thla hnih hnua peihfel a nih hnuah nodal department- Tripura industries and commerce department-ah thehluh a ni ang," tiin a sawi.

Prime Minister Narendra Modi-a'n June 6-a Dhaka a tlawh ṭumin Feni lui chunga lei dawh turah hian Bangladesh Prime Minister Sheikh Hasina nen lung an phum nghal.

Lei dawh tur hi metre 150 (feet 490)-a thui a ni a, Tripura South district, Sab­room aṭang­in Bangladesh, Chittagong inter­national sea port kalpawhna tur a ni a, siam zawh a nih chuan India leh Bangladesh-in sumdawnna lian zawk an nei thei dawn a ni.

Bhowmik chuan India leh Bangladesh official te'n lei dawh tur chungchang chu an tihfel tawh thu sawiin, lei dawhna atan cheng vaibelchhe 100 ruahman a nih thu a sawi.

Hmarchhak state te bung­raw lakluh nan Tripura chuan Bangladesh-a Chitta­gong leh Ashuganj lawng chawlh hmun hman dil tur­in India a lo nawr tawh a, PM Modi-a'n tun hnaia Bangladesh a tlawh ṭum khan hemi chungchangah hian memorandum of understanding (MoU) a ziah fel nghal. Chitta­gong leh Ashuganj lawng chawlh hmun aṭang hian Tripura hi kilometre 70 leh kilometre 40 chauha hla a ni.

Food Corporation of India chuan tun hnai khan Andhra Pradesh, Visakhapatnam lawng chawlh hmun aṭanga Tripura-a buhfai tonne 35,000 lakluh nan Bangladesh-a Ashuganj lawng chawlh hmun hi a hmang tawh bawk.

Kum 2012 khan Bangladesh chuan Oil and Natural Gas Corporation (ONGC) chu 726-MW Palatana mega power pro­ject-a hman tur, khawl leh bungraw lian bakah turbine lian lakluh nan Ashuganj lawng chawlh hmun hi a lo hman tir leh tawh bawk.

Hmarchhak bial hi tlangram chhengchhe tak tak a nih avangin Bangladesh lam aṭanga lawng hmanga bungraw thiar luh hi a awlsam zawk a ni. Tripura khaw­pui Agartala aṭangin Guwahati kawngpui lama kalin Kolkata hi kilometre 1,650-a hla a ni a, Delhi chu kilometre 2,637 a hla a ni. Hetihlai hian Bangladesh lam aṭangin kalin Agartala aṭanga Kolkata hlat zawng hi kilometre 500 chauh a ni.