Assam-in thing ṭiak nuai 25 phun dawn
Assam Chief Minister Tarun Gogoi chuan thing phun beihpui thlakna, Van Mahotsav Week an hman mekah state pumah thing ṭiak nuai 25 phun an tum thu a sawi.
Thing phun chu environment-in a ṭhatpui bakah state mipuite hmasawnna a nih tel thu a sawi bawk.
"State mipui 70 chuangin agriculture leh allied sector hmangin ei an zawng a, hei hian state economy nasa takin a tilian a ni," a ti.
Van Mahotsav Week vawi 66-na puala programme hrang hrang an hman turte tlangzarhna atan Chief Minister Gogoi chuan Pathiannni khan Kamrup district, Boko-ah thing phun beihpui thlakna a hawng a, zirlai, zirtirtu leh Forest department aiawhte'n thing ṭiak ṭhahnem tak an phun nghal.
Van Mahotsav hmang tura Boko mipui pungkhawmte hmaah thu sawiin, Gogoi chuan a kaihhruai sorkarin thing phun puitlin nan theihtawp a chhuah tih a sawi a, state economy chu thing, thlai leh ramngaw-a thil nungte nen inthlunzawm vek an nih avangin thing phun tam a pawimawh a ni, a ti.
Assam Chief Minister chuan thilsiamte hmangaih chu mihring tan a ṭhat thu leh thilsiamte leh mihringte chu inmamawh tawn an ni, a ti.
"Thilsiamte chunga hleilenna chuan inhmuhthiam lohna a thlen a, chu chuan kan environment-ah thil ṭha lo a thlen ṭhin a ni. Thil nung tin rengte inlungrual taka leng za tur chuan thing phun kan uar a ṭul a ni," tiin a sawi.
Van Mahotsav Week hi kum 1950 khan a hun laia Union Agriculture Minister Dr KM Munshi duan chhuah a ni a, kum tin July 1 aṭanga 7 thleng India ram pumah hman ṭhin a ni.