Assam : Golaghat-ah India rama bio-refinery lian ber sa zo

Assam-a Golaghat-ah India rama bio-refinery lian ber leh hmasa ber chu sak zawh niin, prime minister Narendra Modi chuan September thla hian a hawng dawn. Ministry of Petroleum and Natural Gas hnuaia sak, Assam Bio-Refinery Project hi Numaligarh Refinery Limited (NRL) hi Assam Accord hnuaia din a ni.

Bio-refinery sakna tur hi kum 2019 khan Prime Minister chuan lungphum a lo phum tawh a, acre 34-a zau niin Rs vbc 4,000 senga sak a ni. Kum eng emaw chen rim taka sak a nih hnuah hman ṭan theih a ni tawh a ni.

Refinery-ah hian hmarchhak bial hmun hrang hranga loneitute hnen aṭangin kumtin mau metric ton nuai nga vel chawk luh ṭhin a ni ang. Heng mau hmang hian ethanol metric ton 49,000, furfural metric ton 19,000, acrtic acid metric ton 11,000 leh liquid CO2 metric ton 32,000 chu kum khat chhunga siam ṭhin a ni dawn a, kumtin power MW 25 a siam chhuak bawk ang.

Official-te chuan project hian kum tin thingtlang lam economy Rs vbc 200 chuangin a ti pung dawn a; mau chingtu, supply tu leh thawn chhuaktute chuan an hlawkpui dawn tih an sawi. A thawh khatnaah hian loneitu 30,000 vel thawhpui tura ruahman niin, supply chain leh ancillary service hmangin ṭhalai hna nei lo 3,500 te tan eizawnna a siamsak dawn a ni. Economy ṭhanlenna kawnga a puih dawn bakah, ram dang aṭanga crude oil lak luh ṭhin a tih tlem beisei a ni.