Arunachal Pradesh : OIL leh BPCL thawk dun

Maharatna PSU OIL leh Bharat Petroleum Corporation Ltd (BPCL) te chuan Arunachal Pradesh-ah gas distribution network siam tura thawh dunna, Joint Venture Company (JVC) dinna turin inremna, Joint Venture Agreement (JVA) an ziak.

Inremna an siam hmang hian Compressed Natural Gas (CNG) station leh Piped Natural Gas (PNG)-te chu chhungkua, sumdawnna leh industry hrang hranga hman theih turin chhawp chhuah an tum. He inremna hi sorkarin gas hmanga economy leh hmarchhak biala energy thianghlim hman theihna tura a hmalakna pawimawh tak a ni.

OIL hian state chhunga hydrocarbon siam chhuahna kawngah hun rei tak chhung hming a lo chher tawh a, kum kal ta khan Kumchai-Kusijan gas pipeline chu hlawhtling takin an lo siam tawh bawk. Sorkar laipuiin hmarchhak bial tana hydrocarbon hmasawnna a thlenna tura mi pawimawh tak an nih thu OIL chairman & managing director Ranjit Rath chuan a sawi.

BPCL chairman & managing director Sanjay Khanna chuan an thawh dunna chuan hmarchhak bial tan energy thianghlim pek chhuah kawngah nasa takin a pui dawn tih sawiin, City Gas Distribution network ngelnghet tak chu chhungkua, industry, leh transport tan a ṭangkai dawn tih a sawi. He hmalakna hian hmasawnna leh nunphung tihchangtlunna a keng tel dawn tih a sawi bawk.