Meghalaya : CM Connect centre hawng

Meghalaya chief minister Conrad K. Sangma chuan Inrinni khan PA Sangma Stadium, Tura-ah CM Connect Centre a hawng. Centre hi state mipuiten an thil ngaimawh zawng, rawtna leh lungawi lohna an neihte an thlen theihna tura tih a ni a, helpline "1971 - CM Connect" leh platform dang hmangin an thlen thei dawn a ni. State chhunga block 56-ah hawn vek tum a ni.

CM Connect chu program emaw phone number emaw chauh ni loin, an ngaihdan thlenna hmun a ni tih Chief Minister chuan a sawi. He hmalakna hmang hian sorkar leh mipui inkarah thawh hona ṭha a awm dawn a, mipui mamawh phuhru tur inhriatthiam tawnna leh in hrilhhriat tawnna atan a ṭangkai dawn hle tih a sawi bawk.

CM Connect hi chi thuma hman theih niin, technology kaltlangin toll-free number, WhatsApp, chatbots leh CM Connect website-ah te hman theih a ni. Vantlang inkhawm leh block tina centre bakah district-level centre-ahte service pum an kalpui dawn a, chung zingah chuan certificate, application leh scheme assistance-te pawh a tel ang.

Chief Minister chuan mipuite chu CM Connect hmang ṭangkai tura ngenin tupawh an len vek thu a sawi. He hmalakna hian hmaih bik a nei dawn lo, a ti. Hawn a nih hnuah Tura Centre-a complaint hmasa ber lut pawh a ngaihven nghal a ni.