Tripura : Cyber kaltlanga inbumna tlahniam

Tripura director general of police Anurag chuan, Inrinni khan state chhungah cyber kaltlanga inbumna thleng ṭhin vanga harsatna nasa tak an tawh karah, vantlanga inzirtirna an in pek ṭhin chuan awmzia a nei chho mek tih a sawi a, harsatna tawk pawh an tlahniam tih a tarlang.

Tripura Police Headquarters-ah DGP chuan thu sawiin, mi 269 chuan cyber kaltlangin bum an tawk tih a sawi a, an pawisa hloh zat hi a vaiin Rs vbc 51.49 a tling tih a sawi bawk. Pawisa an hloh zinga Rs 33.84 chu hmuh let a ni tawh a, Rs vbc 5.76 chu bank account an hriat chhuah tawhah an la awm thu sawiin, thla thum chhunga lak chhuah theih an beisei thu a sawi bawk.

DGP chuan mipuite chu electric leh gas bill lem, RTO challan, investment scheme lem, police leh income tax official anga in chhala mi bum ṭhin, OTP inruksak, social media kaltlanga in vauna, franchise lem, lottery hmanga inbumna, OLX, courier leh hotel booking platform hmanga bum an nih ṭhin thu a sawi. Kum 2021 khan inbumna thlengah hian Rs 1.98 hloh a ni tih sawiin, kum 2022-ah Rs vbc 4.62, kum 2023-ah Rs vbc 9, kum 2024-ah Rs 25.54 leh kum 2025 July thleng khan Rs vbc 9.77 hloh a ni tawh tih a sawi.

Cyber kaltlanga inbumna chu rampum huapin buaina a tling tawh a, mipui mai bakah cyber lama mi thiamte pawhin bum an tawk fo tih DGP chuan sawiin, India ramah mipui maktaduai 850 chuang internet hmangtu an awm tawh a, online hmanga inbumna a tam sawt hle a ni, a ti. Hetiang inbumna do tur hian DGP chuan mipuite chu app rintlak chauh hmang a, mi dangin an rinzawn mai theih loh tur password siam tur leh rinhlelhawm deuh link te laka fimkhur turin a chah. Buaina an tawk a nih chuan Agartala Cyber ​​Crime Police Station hnenah thlen thuai turin a ngen bawk.