PM-in September-ah Manipur tlawh maithei

Prime minister Narendra Modi chuan Manipur tualchhung buaina a chhuah aṭanga kum hnih aia tam a liam hnuah, tun thla hian Manipur state a tlawh maithei nia sawi a ni.

Bengali portal Ei Samay chuan Prime Minister hi Manipur state-a buaina thlen nasatna hmun, Churachanpur district leh Imphal a tlawh tur beisei a nih thu an tarlang.

PM Modi hian state chhung buaina avanga an in leh lo chhuahsan, internally displaced person-te pawh a tlawh dawn nia sawi a ni a, infrastructure project pawimawh a puan dawn bakah, project zawh fel tawh eng emaw zat a hawng dawn nia sawi a ni bawk.

Manipur-ah hian buaina leh tharum thawhna a thlen lohna atan venhimna khauh zawka kalpui niin, PM-in state a tlawh hun tur tak hi sawichian a la ni lo. Buaina chhuak thei reng dinhmunah an awm avangin thil awmdan chu ngun taka thlithlai reng a ni tih sorkar senior official pakhat chuan a sawi.

Kum 2023-a state chhunga hnam leh hnam inkara buaina a chhuah aṭang khan PM Modi hian Manipur hi a la tlawh loh avangin eptu pawl leh Manipur tualchhung mipui dem a hlawh hle. Kumin February 13 khan Manipur hi President's Rule hnuaiah thla ruk chhung dah a ni a, August 5 khan thla ruk dang pawhsei leh a ni.