Assam : Thadou hruaitu thah thubuaiah mi 5 man

Assam-a Karbi Anglong senior superintendent of police (SSP), Sanjib Kumar Saikia chuan Pathianni khan Thadou khawtlang hruaitu, Nehkam Jomhao thattu nia rinhlelh mi panga man an nih thu leh, an mi thah ruang erawh hmuh a la nih loh thu a sawi. Tualthahna thlen dan kimchang hriat chhuah tumin ngawrh takin an chhui mek tih SSP Saikia chuan a sawi bawk.

Police-te chuan August 30, Inrinni zan dar 7:30 vel khan Karbi Anglong-a Manja huamchhung, Chonghang Venga a chenna in aṭangin misual tu tih hriat lohten Jomhao an rubo tih an sawi a, an mi mante hian an thah thu leh a ruang hi Jamuna luiah an paih niin an sawi. SSP Saikia chuan an mi mante hi Kuki Revolutionary Army (KRA) cadre hlui an ni tih an finfiah tawh thu a sawi bawk a ni. Ruang zawn hna beihpui thlak ni mah se, police-te chuan an la hmu chhuak lo a ni.

Jomhao hi August 6 khan Thadou Inpi Manipur aiawhin Meitei pawlte nena Imphal-a inbiakna neihah telin, hemi hnu thla khat pawh tling loah thah a ni. He thil thlen hnu hian pawl hrang hrang, Thadou Community International (TCI) leh Thadou Students’ Association (TSA)-te chuan Kuki firfiak pawl ṭhenkhatin Jomhao-a'n remna siam a tumna chu harsatna thlentu a ni tiin an bei ta niin an sawi.

Tualchhung hruaitute chuan he tualthahna hi an dem thu sawiin, thuneitute chu Assam leh Manipur-a Thadou hruaitute dikna chanvo humhalh tur leh venhimna ṭha zawk pe turin an ngen a ni.