Manipur : ‘Poshan Bhi Padhai Bhi’ program hnuaiah training pe

Manipur-a Kakching District Administration chuan Integrated Child Development Services (ICDS) Cell nen ṭangkawpin, Anganwadi thawktu 400 chuang hnenah thla khat chhung training hlawhtling takin an pe. Training program hi child development project officer, Ningthoujam Parango Singh chuan kaihruaiin, supervisor, inspector leh Social Welfare Department staff-te pawh an tel.

Ministry of Women and Child Development-in Mission Saksham Anganwadi leh Poshan 2.0 hnuaia a kalpui mek, Poshan Bhi Padhai Bhi (PBPB) hmalakna hnuaiah naupangte chu enkawlna ṭha, zirna, leh ei leh in an mamawh ang an dawn theihna atan training hi buatsaih a ni.

Training hi August 4 aṭang khan batch hrang hrangin an kalpui a, Inrinni khan Library and Information Centre, Kakching-ah a tawp khar a ni. Anganwadi thawktu 100 chuan December 2024 khan training hi an lo zo tawh bawk. Training-ah hian Early Childhood Care and Education (ECCE) chu ngaih pawimawh a ni a, hriselna lama harsatna, Severe Acute Malnutrition (SAM), Moderate Acute Malnutrition (MAM), leh Anaemia enkawlna tur sem chhuah a ni bawk.

Training petute chuan ECCE curriculum pahnih naupang kum 3 - 4 tan ‘Aadharshila’ leh nausen aṭanga kum thum tan ‘Navchetana’ te an kalpui niin, hei hi Divyang, naupang rualban lote tan a ṭangkai dawn hle a ni.