Meghalaya : HC-in khawlai ui chungchanga PIL lut ngaihtuah phalsak ngen

Meghalaya High Court chuan khawlai ui ( stray dog) chungchanga Public Interest Litigation (PIL) theh luh chu ngaihtuah phalsak turin Supreme Court-ah a ngen. Hei hi tun hnaiah Supreme Court-in high court hrang hrangah khawlai ui kaihhnawih PIL lutte chu an ngaihtuah tura transfer vek tura a tih vang a ni.

Ukil senior Kaustav Paul chuan mihringte himna atana khawlai ui an hlauhawm chungchangah PIL hi Meghalaya High Court-ah hian a theh lut a ni. August 30 khan chief justice Indra Prasanna Mukerji leh justice Wanlura Diengdoh-te awmna division bench chuan state-a khawlai ui tam zawk chu mi seh ching leh hlauhawm tak an nih avangin mipuiin harsatna an tawh phah tih an tarlang. Heng uite hi thuneituten an man khawm a, vaccine leh damdawi lam enkawlna pek an nih hnuah pawh chhuah an nih hmain enthlak zui phawt an ngai niin an sawi. Khawlai ui tam zawk chu vantlang mipui tana hlauhawm an nih avangin an dinhmun hrechiang hmasa loa khawlaia tlat tir a him lo tih an sawi bawk.

Bench chuan khawlai ui chungchang chu state level-a ngaihtuah chi a ni tiin, Registrar General hnenah an hnenah PIL lut chu an ngaituah tura Supreme Court-a ngenna siam turin a ti a ni.