Kum 2019 hnuah mipuiten min hmu tawh lo mai thei : Sikkim CM

Sikkim Chief Minister Pawan Chamling chuan kum 2019 hnu lamah chuan mipuiten min hmu tawh kher lo ang a ti a, a sawi awmzia tak erawh a tarlang lo thung.

Tun hnai khan CM Pawan Chamling hian Children’s Day lawmna a hmanpui a, he thu hi a sawi a ni. Chamling chuan kum 2019 hnu lamah chuan mipuiten an hmuh tawh loh mai theih thu a sawi a, hei hian sawi zui a hlawh hle. Mi ṭhenkhat chuan politics a chawlhsan tawh dawn niin an ngai a, term nga zet chief minister a nih hnuah chawlh a tum ve tawh nia ngai an awm bawk. State assembly inthlanah a zawna
ṭum nga thlan tlin a ni tawh a, a term a hman zawh chuan India rama chief minister ni rei ber a ni ang. Chamling hi kum 1994, December 12 a?ang chief minister a ni ?an tawh a ni.

Sikkim CM chuan state assembly-a Limboo-Tamang-te tana seat reservation chungchang a sawi chhuak a, seat nga hauhsak an ni dawn tih sawiin, Bhutia-Lepcha-te seat reservation erawh siam ṭhat a ni dawn lo tih a sawi. Sikkim sssembly-ah hian seat 32 awm mekin, hei hi 40-ah tipung tura rawtna siam a ni. Ruahman dan chuan seat 40 zinga seat 20 chu chu state chhunga hnam hrang hrangte tan hauhsak a ni ang. Hemi chungchanga cabinet rawtna siam hi sorkar laipui pawhin a pawmpui tawh niin Sikkim CM chuan a sawi bawk.

Pawan Chamling chuan state chhunga a hmasa ber turin Lower Sichey-ah medical college din tura hma lak mek a ni, a ti. Medical college din tur hian state sorkar chuan hma a la mek a, a dinna hmun tur pawh a tifel tawh. A hming tur pawh thlan fel tawh niin, Sikkim Institute of Medical Sciences tih a ni ang. Hemi chungchang hi Union ministry of health leh Medical Council of India-ah thlen a nih tur thu sawiin, rang taka bawhzui a nih tur thu a sawi a ni.

Sikkim-a (MBBS), nursing, para-medical, physiotherapy, lab technology leh radiology zirlai 90% zet chuan state danga medical college an pan nia tarlan a ni. Zirlai naupangten doctor ni tura an lo insuangtuah ve ṭhinnna te chu tih hlawhtling turin hma lak mek a nih a nih thu Children’s Day lawmnaah hian a sawi chhuak bawk.

Sikkim khawpui Gangtok aṭanga km nga leka hla, Lower Sichey-ah hian state sorkar chuan khum 1,000 awm theihna tur hospital din turin hma a la mek a ni.